L’à orì la forenadoa de Ciampedìe

Data

07 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 11 de jugn aur la sentadoa de Paolina e ai 13 la forenadoa de Sas Pordoi, de Dèlba-Col di Rosc e de Col Rodela e la sentadoes che da Pera porta sun Ciampedìe.


L’à orì angen, sabeda ai 6 de jugn, l prum impiant portamont de Fascia dò l stop per la pandemìa da Covid-19. La forenadoa de Ciampedìe l’é stat la pruma a tachèr endò ite sia atività te chesta neva sajon da d’istà. Ai 11 de jugn orirà la sentadoa de Paolina, dapò ai 13 de jugn tacarà a viajèr endodanef la forenadoa de Sas Pordoi, chela de Dèlba-Col di Rosc e chela de Col Rodela e la sentadoes Vaiolet 1 e 2 che ponta via da Pera e rua sun Ciampedìe. Anter la fin de jugn e i prumes de messèl se podarà tor ence duc i etres impianc de la val che porta sa mont escurscionisć, pascioné de jir a crepes e bikers.

Sui impianc portamont l’é de obligh jir col couribocia descheche perveit l protocol de endrez e sanitarie per la gestion di impianc aproà da la Jonta de la Provinzia de Trent. Chest protocol perveit ence na maor netijia e la sanificazion di lesc e di ogec che vegn tocé da la jent desche sutìe e passamans. Amò, descheche l’é stat fat fora dal desch tecnich de lurier coordenà da l’assessorat al turism, vegnarà orì de spes la fenestres e i finestrins di impianc per garantir che vegne mudà fora de spes l’aria.

Se cogn ence osservèr la distanza de 1 metro tant ti percorsc de azess che olache vegn fat i biliec e per chest l’é stat endrezà segnèi jabas, cartìe e distanziatores. I lurieranc controlarà che vegne semper respetà la regoles. Dant de comprèr i biliec la jent cognarà se iginienisèr la mans con l gel.

La portèda de la cabines vegnarà smendrèda a 2/3 donca una cabina da 10 posć podarà portèr fin a 6 persones en dut. E ence te chest cajo vegnarà semper controlà che la sie ariejèda delvers. Su la sentadoes bèsta enveze montèr sù con l couribocia.

Via per chest ultim meis la soziètèdes de impianc portamont de Fascia se à dat jù per endrezèr dut delvers e per arsegurèr a dependenc e turisć de poder lurèr e viajèr sui impianc a na vida segura tel respet de duta la ordenanzes contra l Covid-19.   (mci)