La Usc di Ladins

Se n rejonèa jà da n trat de temp: chest an a Cianacei fossa stat festa grana en ocajion di setant’egn del Grop Folk de Dèlba, Penìa, Cianacei e Grìes. Aboncont, con chesta burta petorcena che l’é vegnù adalèrch, l grop à dezidù, bensegur en videoconferenza, de sburlèr la festa a l’an che vegn.

Nos volon festejèr chest emportant travert ve contan zeche de più en cont de la storia, no semper sorida, de chest grop. Per ne didèr te chesta endesfida aon tout cà l liber »N bal lènch 50 egn« de Claudia Conta.

La jent de Cianacei à semper abù n gran gust per i colores tradizionèi di guanc e per la legreza del balèr: jà dò la Gran Vera, entorn ai egn vint, l’era stat endrezà dotrei formazions. Chisc gropes no i aea nesciun regolament o recognosciment: i camaric e la camarites balèa regolé col guant tradizionèl da festes a temp de musega compagné da n bandierèl. Enlouta la bandiera l’era chela con cinch colores, dapò la é doventèda de set colores. 

Enceben la gran pascion, la stentes e la meseria de enlouta no les consentìa la fondazion ofizièla de n grop e seence che tel cher de chela jent de enlouta l’era na forza viva e n amor fort envers la tradizions fascènes, demò pecia persones podea aer amò a la leta n guant »a l’antica«. 

La gran vera no aea ampò dessatà l’amor di fascegn per sia tradizions e per sie bai. Dò la pruma, l’é ruà ence la seconda gran vera, e la se à tout beleche dut, aboncont la gaissa de fèr comunanza nience chest conflit no l’é stat bon de la robèr...


Podede jir inant con l'articol su la Usc nr 21 stampèda ai 29 de mé  (Nicoletta Riz)