La Usc di Ladins

No pel esser aisciuda zenza conzert de la Musega de Poza. Co se pelel far donca se i protocoi de la fasa-2 per l Covid no ge dasc amò l met ai museganc nience de se binar a far proa? No ve cruzià, che l maester Giancarlo Dorich Cavei l se fasc ben vegnir tal ciaf valch!

Defat jà da n trat su la piata Facebook de la Musega l’à tacà a anunziar che i é dò a lurar a n event de chi da recordar. En cont de evenc »memoraboi« la Musega da Poza l’à na longia storia, che à tocià le ponte più aute canche i é jic a sonar su le Torn del Vaiolet, e dapò canche i à endrezà l spetacol te Jonta con dute le 4 Museghe de Fascia, e amò canche i à portà l’unicum de na Banda a I Sons de la Dolomites, sun Vael, ensema con l musizist de ecezion Paolo Fresu.

Apontin pissan a chisc momenc ‘epics’, ma vardan ence a l’esperienza de chisc meisc passé, canche n muie de Museghe e gropes se à endrezà per far conzerc en video da dalonc, l’é nasciù la neva endesfida che l maester ge à metù dant a si museganc. Ben segur na registrazion fata da dalonc, ajache sun chest no l’é alternative, ma valch che posse aer n valor assolut e sorafora l temp – chest se à pissà l maester – no demò n espedient, n tacon da meter sul busc de n conzert descancelà per forza.

La realisazion de na bela idea l’é stat dassen na gran endesfida. N'idea che noi aon l met de veder, scutar, aprijiar e comentar apontin en sabeda ai 13 de jugn da le 9 da sera, canche vegnarà fat na direta per l Conzert d’Aisciuda 2020 sul Canal Youtube, su Facebook e su Instagram de la Musega de Poza.


De più su la Usc nr 23 stampèda ai 12 de jugn  (Lucia Gross)