Pere stradon de Fascia

Data

14 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Anter Soraga e Sèn Jan l’é n bon pec de mures che é dò che se desfasc. Na situazion pericolousa che cogn vegnir metuda a post 
Anchecondì la Region e le doi Provinzie de gra al Statut de Autonomìa jit en esser del 1972 le à competenza primara su le strade e donca l’é dut te man del Servije provinzial »Servizio gestione strade« con tant de stempel che se l veit e se l lec sui desvalives cantieres chiò e ló. Ma segur de no su la streca anter l termen del Comun de Soraga e chel del Comun de Sèn Jan, per se entener anter i pré ló da capitel de la Roca, toronaa e Ciarlonch – Pont de le Laste, chele 3/4 utade pericolouse zenza vijion, anter l bosch. Chiò, coche rejona la fotografìa, l’é n bon pec de egn che chi mures fac sù con tant saer enlouta ti egn 1950 i é dò che i se desfasc, i zet e nesciugn ge met man.

Ma l Servije Strade e chi che l’é a ciaf, i dirigenc, no véidei l besegn de ge meter man dant che sozede valch da encrescegol, n azident ló sun chele utade de Pont da le Laste? Ló passa l trafich de duta Fascia, no segur a pas de om, ma ence a 70/80 chilometres a l’ora e valch Schumacher amò con più gaissa… Che ge vélel? Ge vélel, coche disc la tradizion popolara, doi o trei morc per ge meter man?

E no besegna scomodar i politizi per veder e ge meter man, i lurgeranc e i dirigenc i passo ló vigni dì… chi saràl pa che à tout demez part di sasc e empiantà ló n palet de plastica, chi che i usa d’invern dant che l neive? Donca per ge meter man, dant che sozede valch da burt, besegna demò la bona volontà, no creise che mence finanziamenc a veder i lurgeres che vegn fat te desvalives lesc de la Provinzia de Trent olache no passa nience n diejem de auti che passa te Fascia.

Acà i egn, l’enlouta conseier ladin Bepe Detomas, aea provedù acioche l Servije Strade de Trent ge mete man ai mures e auter del stradon de Fascia, valch se aea moet ma te chel toch scì pericolous nia de nia. Per sie intervent l conseier Detomas, che da coche l me à contà l’é stat beleche n »recat«, ti egn 2016-2018 l’é stat metù man e restaurà i ponc e valch utada e mur pericolous de la strada anter Vich e l Jouf de Ciareja che te desvalives lesc l risiaa de sliziar jù te chele valene sot ju. Chesta l’é na strada de vitala emportanza per i fascegn che va jun Busan o tel Sudtirol e ence per i turisć.

E l’é da trar cà e descuerjer l vero problem de la Provinzia de Trent da egn e egn envers Fascia durada desche na bona vacia da moujer per dapò durar sie contribuc utró. Segur de no per l ben comun o publich ma demò te chel privat o personal.

Tel ciamp de le strade podon veder con nesc eies la desferenza varean l Jouf de Ciareja, te la Val d’Ega o ence per ejempie dò Sèn Lugan su la strada de le Valace enscin a Ora. Ló se veit la desferenza anter le doi Provinzie e la programazion de le strade da mont, no rejonon pa di jouves, demò moujer…

Ma per conciar sù n mur, me domane, besegnel spetar che rue i scioldi da la Comunità europeana? E che spetone pa fascegn e passar da l’autra man?


Articol entriech su la Usc nr 23 stampèda ai 12 de jugn  (Fernando Brunel)