»Cheste regole no va ben per noscia realtà da mont«

Data

13 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La linees vida per la gestion en segureza de l’animazion per i bec aproèdes da la Provinzia de Trent met en dificoltà la sociazions de Fascia
»La sospenjion no demò de la scola, ma ence de duta la ativitèdes educatives, sozièles, sportives e de grop à tocià trop i bec e i joegn. La pandemìa no à pedimentà demò i afec, la sanità, l’economìa ma ence l cher medemo de la families. Per n lonch trat de temp i bec no à podù fèr nesciuna atività fora da cèsa e da la familia, no i à podù scontrèr si amisc, jièr con ic e stèr en compagnìa. Per chest l’é de besegn de i didèr, enceben mìngol a l’outa e aldò de regoles prezises, a tachèr endò ite sia sozialità e ge dèr n sostegn a la families e ai genitores.« 

L’é stat chesta la paroles de l’assessora a la sanità de la Provinzia de Trent Stefania Segnana al moment de l’aproazion de la linees vida per la gestion en segureza de ativitèdes de sozialità e jech per i bec e joegn dò l’emergenza Covid-19. N document che met dant duta na lingia de regoles de endrez, la prateghes de sanità, de netijia e dejenfezion, de la doura di despositives, l’endrez di desvalives momenc de la giornèda, l distanziament. Regoles prezises e rigorouses che à metù en dificoltà n muie de strutures, de sociazions e de enc che se cruzia de endrezèr l’ativitèdes da d’istà per i bec.

Con chesta regoles à cognù se confrontèr chisc meisc passé ence i responsaboi de la desvaliva sociazions o gropes che se cruzia de l’animazion per i bec te Fascia. Ades che l’é vegnù fora la linees vida i à tedant na situazion mìngol più chièra che purampò enveze che i didèr te l’endrez les i met tedant a empedimenc e regolamenc che no sarà sorì respetèr. Per chest l’é belebon enirà Biju Vadagnini, president del Zenter Joegn de Moena e coordenator de Istà Algegra. 

»L’é da jenè che laoron per meter jù i neves programes de Istà Algegra cerian de respetar l raport più larch anter educatores e bec e ades i ne met dant cheste linee vida che empedesc defat de portar inavant n mulge de chel che aane programà – à dit Biju Vadagnini. Chisc l’é regolamenc empensè da jent che no à mai fat nosc mestier, che va ben per i spazies te zità e no per lösc da mont desche i nösc. I ne disc che cognon far gropes da set tosac con un animator e per i più gregn gropes da 10. En pratega per dut istà un animator soul se troarà semper col medemo grop de tosac che no pol se mescedar anter de ic, canche magari a ciasa e al parch de jeghes i jia duc ensema. E se per cajo un tosat se fasc mal che cognel far l’educator, no l pol lasciar l grop per jir a domanar aiut.«


Intervista entria su la Usc nr 23 stampèda ai 12 de jugn   (Monica Cigolla)