La Usc di Ladins

“Dut se à fermà, dut fora che la voa de scomenzèr da nef, percheche saer reagir vel dir scombater e cambièr la cosses, desche i prumes fiores d’aisciuda delicac e sprigolé, che i cresc ogne an con forza, i se fèsc lèrga tel teren amò giacà. Nos volon con noscia musega portèr endodanef chela armonìa che ne é stata portèda demez, coloran chel acort che l’à empienì noscia beliscima crepes.”

Con chesta paroles da la piata Facebook rua l’envit de la Musega Auta Fascia a tor pèrt al conzert en direta streaming “Fiores che renasc” che se podarà veder doman, sabeda ai 13 de jugn da les 11.00 da doman bonora.

N conzert pissà per recordèr la vitimes che à fat l Covid-19 e per pontèr via endodanef duc ensema con maor gaissa, con speranza e con viveza.

L’é stat n moment rie chel che aon passà fora per via del coronavirus, n muie de jent à perdù i parenc, i genitores, i frèdes, i amisc. Jent che é se n jita da chesta tera tel solentum, zenza la prejenza de chi de cèsa, de la comunanza. I paìjes de la Val de Sora é stac tocé più che i etres da chesta burta epidemìa sanitèra ma ades l’é ruà l moment de pontèr via endodanef.

La Musega Auta Fascia vel recordèr coscita chi che à padì, chi che se à spenù e a reagì e la vel ge sporjer n develpai zenza fin a duc i dotores, i infermieres e i operatores sanitères che con sia forzes e sie gran sacrifizie l’é stat i prumes che à tegnù auta la speranza e à desmostrà che dut l’é possibol. 

La Musega sonarà dal vif, respetan ben segur duc i protocoi de segureza, da una de la più bela pizes de la val e de duta la Tèlia. N conzert che vel orir ence la neva sajon d’istà e che vegnarà tout sù e manà fora sui canai de l’Apt e ai tg nazionèi per fèr promozion e reclam a duta la val. Sarà imagines spetacolères e museghes de speranza che ne portarà anter la marevees de noscia monts.  

La Musega Auta Fascia sona per la comunanza con n omaje che vegn dal cher e la ve envìa a scutèr sù sie conzert doman da les 11.00 sun sia piata Facebook.  (MCI)