Cassa Rurala, na radunanza fora de anter e n nef diretor

Data

18 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A cauja del Covid l’Istitut de credit de nosc teritorie à cognù fèr na cernuda forta endrezan l moment anuèl a na vida alternativa. Vegn mudà l’inom te Cassa Rurala Dolomiti 
La radunanza di sozi che vegn chiamèda ite na outa a l’an l’é n moment de gran emportanza per na sozietà, l’é n moment fon de condivijion, l’ocajion per fèr l pont su l’atività portèda inant, sui resultac arjonc, sui obietives neves da meter dant. Chest an la burta magagna sanitèra che à tocià dut l mond à obligà a anulèr evenc o situazions che perveit la prejenza de n gran numer de persones, opura a les meter a jir a na vida alternativa.

Ence la Cassa Rurala de nosc teritorie à cognù fèr na cernuda forta per stravardèr la sanità de si sozi e colaboradores organisan la radunanza travers la prozedura del »Raprejentant Designà«. Se trata de n profescionist cernù da la banca a chel che i sozi ge dèsc l’encèria de tor pèrt e palesèr sia stima sui desvalives ponc de l’orden del dì a na vida del dut resservèda.

La Cassa à enciarià l notèr Alessandro Franco desche Raprejentant. I sozi à jà ciapà a cèsa la delega e l material con la istruzions per votèr. Duta la documentazion, ensema a na copia del document de identità, sotescric con firma autografa é da consegnèr te la urnes a la leta te la desvaliva filiales de la banca endèna l’orarie de portel, opura manèda per posta o corier al Studie del notèr Alessandro Franco, strada Neva 18, Sèn Jan inant da les 13.00 di 22 de jugn del 2020. L material che aessa da ruèr dò da chesta data no l sarà tegnù en conscidrazion. La documentazion completa é a la leta te la filiales e sul sit de la banca te l’area sozi.

Anter i ponc a l’orden del dì l’é ence la litazion de la neva encèries sozièles. Desche pervedù dal Statut l nef Consei sarà componù da 9 aministradores: 4 lité ti comuns de Fascia, 2 te chi de la valèdes de Primier e Vanoi, 2 ti comuns de l’Union Montana Agordina e 1 te chi de l’Union Montana Feltrina e l’Union Montana Valbelluna. Vegnarà ence lità i componenc del Colege Sindacal e di Probiviri. La lista di candidac é a la leta te la filiales o sul sit te l’area sozi. Tel material ruà a cèsa l’é ence la zedola per litèr l renovament de la encèries: vegn racomanà de meter vèrda a respetèr l numer de preferenzes pervedù se no la stima vegn anulèda.

La radunanza di 25 de jugn arà ence na pèrt straordenèra per poder mudèr te l’articol 1 del Statut  l’inom de l’Istitut de credit: l Consei de Aministrazion propon la denominazion »Cassa Rurala Dolomiti« vedù che la é raprejentativa del teritorie e la vegn oramai semper durèda da sozi e clienc. Se i sozi sarà a una l’inom arà valuta dal prum de aost del 2020.

L’é ence n’autra neva che i referenc de la Cassa aessa abù piajer de ge portèr dant ai sozi de persona: l mudament te la direzion. Dò aer vidà la Cassa per passa 20 egn l diretor generèl Luciano Braito à arjont i requisic per jir en penscion e a tor sie post sarà Ruggero Lucin, che laora jà te l’Istitut ma che tolarà sù ofizialmenter sia funzion col prum de messèl del 2020. 

Lucin vegn da Rovigo, olache l’era diretor generèl de RovigoBanca, ma l’é trentin de origin. Tole sù na arpejon emportanta – l’à dit – chesta banca à duc i papieres en regola per seghitèr a fèr da motor per l’economìa de nosc teritorie e, se l’é possibol, ence per fèr amò n vèrech inant, ence se prum de dut ge vel mantegnir chel che l’é stat concostà.


Articol entriech su la Usc nr 24 stampèda ai 19 de jugn  (Cristina Marchetti)