La Usc di Ladins

Se pel jir te gejia… fin che l’é post. Chesta l’é la fasa-2 de la zelebrazions, che da vèlch setemèna en ca la ge à dat ai fidei de nef la possibilità de aer la messes la domenia. La jent pel defat jir te gejia col destanziament, la sanificazion de la mans e l couribocia. Per chi che enveze da ite no troa post a cauja de la limitazion de la lèrga, e con la sajon turistica i sarà semper de più, vegn enjignà de fora carieghes, na soluzion piajegola (enscin che l'é soreie).

Chi che à podù ruèr te gejia de Sènt Antone de Dèlba, arà ence podù veder che mencia i doi picoi utères laterèi con la statues de la Madona e San Giosef. Emben no l’é pa stat i lères a se les tor, enceben che zacan i śirèa te la  gejies fascènes a la enrescida de tesores: i vegnarà enveze restauré da la Voltolini Restauri de Vigolo Vattaro, opera paèda dal Grop de la Mèscres de Dèlba e Penìa. Canche i utères e la statues vegnarà de retorn ta Dèlba dò l restaure, ve faron saer de più sun chisc elemenc che fèsc più rich l patrimonie storich e artistich de noscia val.  (Daniele Verra)