La Usc di Ladins

Descheche à cognù fèr duta la aziendes te chesta situazion de emergenza, ence l’Apt de Fascia à endrezà sia radunanza generèla travers la partezipazion demò del Raprejentant Designà, radunanza che é stata metuda sul calandèr en mercol ai 8 de messèl. Desche raprejentant l’é stat designà la Federazion Trentina de la Cooperazion te la persona de Gabriele Barichello.
Aboncont per meter en consaputa i sozi del bilanz e de la neva scomenzadives per l’istà 2020 e per i envièr se sà ben a dèr jù sia stima portan deretorn i papieres ti ofizies sul teritorie, en lunesc ai 22 de jugn l Consei de Aministrazion à endrezà na direta streaming sun YouTube.
Dantfora l president Fausto Lorenz à volù recordèr Clara Nicolodi, mère de Walter Nicolodi, na persona che se à dat jù duta la vita tel ciamp del turism.
L’à dapò recordà i passajes più emportanc de la neva reforma del turism de l’assessor provinzièl Failoni che jirà en doura del 2022: l ghest cognarà semper esser al zenter de l’atenzion, la calità del teritorie e del paesaje l’é i elemenc fondamentèi ence per n turism internazionèl e per smaorèr l vadagn de noscia aziendes. »L’assessor Failoni à semper dit che demò le gran Apt podarà se tor dant le endesfide senestre di egn che vegn - à sotlineà Lorenz - e noi no podon far condemanco de esser enjigné. Per chest jà del 2017 l’Apt à envià via n percors sun chesta strada, n projet inovatif, na neva stategia turistica col suport de TSM per portar la gestion de l’azienda tel davegnir.
Per aer maor resultac l’Apt à tout sù Nicolò Weiss con l’enciaria de ge star dò a la projetazion e a la comunicazion, el laora te n n nef ofize fat fora a Poza olache l’é stat metù ensema la neva area web con la comunicazion.«
L president Lorenz à dapò let jù l bilanz serà sù ai 31 de dezember del 2019 che veit amò n smaorament de utol per via de maor prejenzes e donca de n maor retorn de la steora de sojornanza. 
»L’autofinanziament ne consent de restar a passa l 51% de contribuc privac e chest ne deida a lurar a na vida più asvelta e percacenta« – à dit amò Lorenz.
L bilanz se sera sù con n arvanz de aministrazion de 57.526 euro. N bilanz de passa 6 milions de euro che à permetù de sostegnir n grum de ativitèdes e de investir te projec per l’oferta turistica. Del 2019 l’é stat endrezà i Mondièi Junior de schi e l Fassa Enduro World Series che à abù gran suzess de gra a l’empegn di responsaboi Davide Moser e William Basilico a chi che l president à volù ge sporjer amò n fort develpai. N muie l’é stat investì ence su la comunicazion e l marketing, su la promozion di marcé te la Tèlia e foravìa e su l’endrez de meeting. 

Podede lejer l'articol entriech su La Usc di Ladins nr 26 di 3 de messèl  (Monica Cigolla)