La Usc di Ladins

La radunanza de la Cassa Rurala Dolomites de Fascia, Primier e Belun, portèda inant chest an a na vida deldut unica, se spera, te sia sort, zenza la prejenza fisica di sozi ma col Raprejentat Designà a ge dèr ousc, te la pèrt straordenèra l’à deliberà la neva denominazion »Cassa Rurale Dolomiti«, più curta, asvelta ma semper raprejentativa del teritorie, anter l’auter jà durèda ence inant a na vida informala da sozi e clienc.
Te la pèrt ordenèra enveze l’é stat aproà l bilanz 2019 che se à serà sù con n utol de ejercizie de 8,5 milions de euro, che da na man jirà a renforzèr l patrimonie e da l’autra vegnarà metù via desche ressorsa da durèr per intervenc sul sozièl.
L notèr Alessandro Franco, enciarià da l’Istitut de credit per raprejentèr i sozi, l’à ciapà presciapech 1.300 deleghes: a chesta vida la radunanza à aproà duc i ponc a l’orden del dì e renovà la encèries sozièles.
Te Consei de Aministrazion, per chel che vèrda la Circoscrizion de Fascia l’é stat lità Carlo Vadagnini, Osvaldo Debertol, Norbert Bernard e Paolo Vadagnini. Per l’Agordin Piergiorgio Serafini e Davide Piccolin; per Primier e Vanoi Maurizio Bonelli e Graziano Molon; per Feltrino Valbelluna Alessandro Scopel.
Carlo Vadagnini l’é stat confermà da nef te l’encèria de president dal CdA che se à binà ti dis dò la radunanza. Maurizio Bonelli e Piergiorgio Serafini l’é i vize e Osvaldo Debertol l’é l president del Comitat Esecutif.  Per chel che vèrda l Colege Sindacal, president l’é Nicola Zanoner apede a Monica Pistoia e Sonia Zuliani, membres efetives.  (Cristina Marchetti)