La Usc di Ladins

Apede al confin anter Cianacei e sia frazion de Dèlba su la SS 641, aló per se entener olache l’é la senta de la Protezion Zivila de Cianacei, l’é stat fat n intervent da man de la Provinzia de Trent sul Pent de la Roa. I lurieres era scomenzé amò tel meis de mé e da n trat en ca (ordenanza comunèla nr 38 dal prum de messèl) l’era stat ence ativà l sens unich alternà da man del comun de Cianacei per consentir i lurieres de restruturazion pervedui.
Con la metà del meis de messèl i lurieres é stac seré sù, en temp per l maor trafich de aost, e l’é stat l met de veder i mioramenc che l’é stat fat: l pent l’é stat slarià e ades apede a la strèda per i auti l’é ence l marciapé tant a dreta che a cencia. Amò apede l’é stat sotrissà la segnaletica depenta su l’asfalt e jontà n traversament pedonèl che lea coscita la promenada che ge va dò a la Veisc per jir da Cianacei a Penìa.
Bendeché aló la jent passèa via stradon ence dant, con gregn risesc per via de la pecia visibilità de la doi utèdes sul pent e da la velozità vèlch outa auta di auti.  (Daniele Verra)