Elisa Maccagni neva presidenta

Data

29 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La é stata litèda a cef del Consorzie impianc portamont de Fascia e Ciareja. Daniele Dezulian l’é vize president
En mèrtesc ai 28 de messèl te sala de Consei del Comun de Sèn Jan se à tegnù la radunanza ordenèra del Consorzie impianc portamont Val de Fascia e Ciareja per l’aproazion del bilanz serà sù ai 31 de mé de chest an 2020. L Consorzie, che tol ite 15 sozietèdes consorzièdes per n total de 57 impianc portamont e 110 chilometres de portoes, à aproà dut a una l bilanz. L’é stat portà dant ence i dac che revèrda la sajon da d’istà del 2019 e chi de la sajon da d’invern 2019/20 che se à serà ai 9 de mèrz per via de l’emergenza sanitèra da Covid. Per chel che vèrda la sajon da d’istà 2019 l’é stat registrà n +17,4% respet a chela del 2018, l’é stat una de la mior sajons e chest conferma l portenzial de crescimonia che l’é amò per chel che vèrda i meisc ciauc.

Auter descors enveze per chela da d’invern che la era pontèda via benon de gra a la neif vegnuda prest, jà coi prumes de dezember, e al calandèr favorevol per la festes e i penc tant per i taliegn che per i foresć. La é jita inant a na vida positiva fin ai prumes de mèrz purampò a la fin l’é stat segnà n -10,34% de passajes totai respet a l’an dant e n -10,72% de prumes engresc.

La radunanza di sozi à renovà ence la encèries sozièles. L’é stat lità la neva presidenta Elisa Maccagni al post de Daniele Dezulian che é tanche stat lità nef president de la SITC e che ades é vize president del Consorzie. I etres componenc del Consei l’é Daniela Perathoner (SITC), Tullio Pitscheider (Ciampac/Contrin), Claudio Bernard (Ciadenac), Christian Lorenz (Bufaure), Georg Eisath (Skiarea Ciareja). L’é stat dapò nominà presidenta del Colege di Revisores Maria Pia Bontempelli, apede ai neves lité Denise Pederiva e Robert Herschbaumer.

Endèna la radunanza l’é stat rengrazià de cher i componenc del Consorzie che é jic fora: Paolo Fosco, Giancarlo Agostini e Robert Putzer.  (Monica Cigolla)