La Usc di Ladins

Se à serà sù en domenia ai 2 de aost i lurieres con longia discuscion te Consei provinzièl per l’aproazion de l’assestament del bilanz preventif de la Provinzia de Trent 2020 con 20 stimes a favor e la 2 astenscions di soi conseieres de mendranza resté te Consei dò che i etres aea arbandonà i lurieres i dis dant per protesta.
Te chesta ocajion l’é stat aproà ence na ressoluzion consiliara portèda dant da 13 conseieres de maoranza. Tel test tout sù vegn metù dant la linees de azion che ge vegn domanà al goern provinzièl per portèr l Trentin fora da l’emergenza e da la crisa. Se rejona de Publica aministrazion che cogn vardèr a obietives e resultac, de prospetiva macroregionala, de Agenda 2030 de la Nazions Unides, de scola endrezèda più che l’é meso en prejenza, de formazion de dozenc, de svilup de la tecnologìes telematiches, politiches per la cèsa, politiches atives per l lurier, welfare aziendal, renforzament e patrimonialisazion de la aziendes. N document che empegna la Jonta e l Consei a lurèr per l ben del Trentin e de la comunanza.
I lurieres te Consei é jic inant n bon trat per i sacontenc emendamenc e ordegn del dì prejenté dai conseieres. Anter chisc l’é da uzèr fora i doi porté dant dal conseier ladin Luca Guglielmi e aproé te la giornèda di 29 de messèl.

De più se pel lejer su La Usc 31 de vender ai 7 de aost  (Monica Cigolla)