I ombolc te Fascia per i 5 egn che vegn

Data

22 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I ejic de la litazions ti Comuns i é beleche definitives, enveze per l Comun General se cogn amò spetèr.


I é oramai duc confermé i ombolc che rejarà i 6 Comuns de Fascia ti 5 egn che vegn. 

L prum l’é stat l capocomun de Cianacei, Giovanni Bernard “Zuf”, soul candidat a la leta te chest comun con sia lista “Ensema se pel”. Per el l’endesfida l’era chela de arjonjer l quorum, vedù che l’era stat fat ence campagna per l’astenjionism. L’à arjont 905 stimes, beleche l’84%, donca n resultat che ge lascia pecia lèrga ai dubies. 

A Ciampedel, olache l’era trei listes, à vent con larch vantac Ivo Bernard, ombolt te chisc 5 egn passé, che con l 66% de stimes l’à più che dobià l resultat de sie passà vizeombolt, Stefano Sommavilla, che se à fermà al 28%. Sot al 6% l resultat de la terza candidata, Serenella Manfroi.

Conferma a Mazin per Fausto Castelnuovo, che dò aer fat na legislatura da vizeombolt ajache l’aea jà fat trei mandac, l se à endò metù dantfora. Con sia lista “Duc adum – insieme” l’à arjont l 58,42%, enveze la candidata Manuela Spinel con “Vardon inant” la é ruèda al 41,58%.

Situazion belebon valiva a chela de Mazin ence a Soraga, olache Valerio Pederiva, esprescion de la maoranza de Devi Brunel che aea ret l comun ti ultimes 5 egn e che l’é restà en lista con el, l’é ruà al 58,70%; da l’autra man la neva lista de Fernando Brunel é ruèda a passèr via l 41%.

A Moena à vent Alberto Kostner, che con sie “Grop per Moena” l’à passà via l 65% del consens, lascian Riccardo Franceschetti sot al 35%. 

En ultima tel maor Comun de Fascia, Sèn Jan, l resultat no é amò definitif ma somea segur che la venta sie jita a l’ombolt de la fujion, Giulio Florian. L'é ofizial l'ejit te doi sezions sun trei, olache Florian l’à passà via l 56% e Battisti la é ruèda al 43,65.  (lg)