La Usc di Ladins

Doi ölges vives e n grignot doic e delicat, ciavei bienc che encornija n vis seren, doi man che conta na storia longia de laor e empegn. L’é chel che sauta a l’ölge a ge vardar a la Bepina del Felizon che enstadì l’à compì 100 egn!
Giuseppina Chiocchetti da Moena la é nasciuda ai 27 de setember del 1920, la é giusta ruada a n secol de vita, dut somà en bona sanità. L’à ben valch magagna, la ge vesc e la ge sent pöch ma l’à arjont n travert dalbon emportant, segur no da duc. N travert che no se podea far condemanco de festejar. E coscì l’é stat.
En domenia passada, apontin ai 27 de setember l’é stat fat na bona marena en familia coi parenc più strenc, ne à contà l proneó Stefano Defrancesco. Sora desch i ge à domanà se la se recordava de canche la jìva a scola: ela l’à contà che canche se saeva la lezion o se responeva polito te na interogazion l maester l dajeva la ‘cambialeta’ con su scrit l voto; dapodò se la se recordava del viac de noza e l’à dit che i era jic a Maran per dotrei dì, con un di primes taxi che tacava a se enjegnar enlaoita. Ne disto trei consees de vita? – l ge à domanà amò l proneò. La Bepina, col ferstont che rua cà da na esperienza longia egn e egn, l’à responù de soportar, lasciar perder e far mena de nia.
Dapò marena l’à tacà a ruar la procescion di neoes e dapodò ence parenc e amisc a se magnar ensema n bon conech de torta e ge far mingol de festa. Una de le neoe la ge à portà en don 100 rese e a ogneun che ruava a la troar la ge n dajeva una en segn de rengraziament.
La Bepina la é stata tant contenta de dute chele atenzion ence se la se à stracà belebon dapò ore e ore de ciacole.
Entorn le cater dapò marena l’é ruà Cristina Donei en raprejentanza del comun de Moena, che l’à abù per ela de bele parole, la ge à dit che la é »l fior de Moena«.
Dapò l’é vegnù l curat don Enrico che à zelebrà la messa te stua ensema con don Elio Sommavilla, jerman de la Bepina.
Dapò ancora n moment de legreza la Bepina à podù paussar le fadìe de na giornada dalbon speziala, fata int te l’amor de sova familia, te la legreza de aer podù festejar n travert dalbon unich.
De bie augures, Bepina, ence da man de la redazion de La Usc di Ladins!