La Usc di Ladins

»Fosc amò de più che na familia, na Musega l’é na part emportanta de na comunanza, e te le comunanze sane e armoniche, i mudamenc l’é n segnal de vitalità«. L’é con cheste parole che Luca Senettin, l president de la Musega de Moena, ne met en consaputa de la neva de chesta sociazion.
Dò 10 egn la maestra Annarosa Pederiva l’à dezidù de lasciar sù la direzion e de jir deretorn anter si compagnes a sonar l flaut. »Na dezijion condividuda con l nöf diretif che é ruada dò na fona riflescion fata endana l lockdown – à dit l president Senettin. Ti mesc de paussa l grop à tacà a se domanar co far a ciapar endò int con gaissa e proprio te chest moment la maestra Annarosa, con gran maturità, ne à portà a ragionar sul fat che fosc ades l’é ora de tacar int na neva fasa e che a ela dò 10 egn ge sà de aer dat dut chel che la podeva dar desche maestra. Coscita al scomenz de jugn aon tacà a se vardar entorn per troar n nöf maester, aon rejonà con la Federazion e i responsaboi de val. Aveane sentù che l maester Roberto Silvagni l fosse stat desponibol, ge aon domanà, se aon troà a rejonar ensema al diretif e sobito se aon piajù e se aon cordà.
En vender ai 3 de otober l’é stat la prima proa de Banda con l nöf maester. El ge à tegnù subit a dir che no l völ straoijer le tradizion de la Musega – à dit Senettin – e che l capisc benon che no l’é n’orchestra ma n grop de pascionè che se troa percheche ge piasc sonar ensema. L’à dit ence che l mantegnarà na part de sonade tradizionale ma che l völ ence ge dar na növa viesta per la adatar ai tempes modergn.«

De più su La Usc 40 di 09 de otober  (Monica Cigolla)