Dò n trat de temp de paussa forzèda, se mef endò via con gaissa l projet »#Fuoricentro: coltiviamo le periferie«, la gran scomenzadiva che tol ite 30 anter istituzions, sociazions e realtèdes del teritorie, coordenèdes da la FTVC (Fondazion Trentina per l Volontariat Sozial) che se dejouc te 3 valèdes de la Provinzia de Trent.
La comunanza de Fascia, ensema con cheles del Tesin e de la Paganella, la é protagonista de chest projet che à regnèda 3 egn e che jirà inant fin l’aisciuda de l’an che vegn. L’é un di 86 projec de duta la Tèlia (l soul tel Trentin) aproà da l’impresa sozièla »Con i bambini« tel chèder del »Fondo per il contrasto alla povertà educativa«, na organisazion nazionèla metuda sù apontin per chest obietif.
Al zenter de dut l projet l’é l conzet che l miorament de na educazion globala di joegn ge pervegn a duta la comunanza e no l pel ge vegnir dat sù demò a la scola. #Fuoricentro l’à apontin desche prum obietif chel de sensibilisèr duc i partezipanc e duc i teritories su l’emportanza de chest conzet. Creèr na comunità educanta vel dir creèr n model olache la responsabilità educativa sie n empegn de più atores. N model de comunità olache la scola, entenuda desche agenzìa educativa tel sens lèrch, posse seghitèr ence fora da la scola medema, te la convinzion che l’educazion l’é na costion che cogn se tor sù duta la comunità: dai ensegnanc a la families, dai aministradores ai alenadores, dai bibliotecares ai giaves.
De più su La Usc 40 di 09 de otober
(Monica Cigolla)