La Usc di Ladins

Na trentina de persones à ciapà post a la dreta distanza en lunesc ai 5 de otober te sala del Consei de Comun de Sèn Jan, olache se à binà i 18 componenc lité ai 20 e 21 de setember per rejer o controlèr l’aministrazion del Comun per i 5 egn che vegn.

A rejer l prum Consei, encèria che aldò del regolament che pervegn al conseier più de età, l’é stat chiamà la conseiera de maoranza Antonella Winterle che l’à pech più che 50 egn: chest lascia entener sobito che a Sèn Jan l’é na aministrazion joena.

Dò aer verificà aldò de la normes col Secretèr Luigi Chiocchetti, che no sie condizions de incompatibilità, duc i conseieres à ratificà la nomina a ombolt de Giulio Florian de Ciout, che à fat con solenità sie jurament per fascian col batiman del publich.

L medemo control de compatibilità é stat fat per duc i conseieres lité e dapò l’ombolt à comunicà chi che l’à cernù per sie esecutif. Per l’encèria de vizeombolt l’é stat confermà, desche ti ultimes 2 egn dò la fujion, Germano Pedrotti, e a el ge é stat dat ence la delega al patrimonie.

Simone Zulian ti 5 egn che vegn se cruziarà de turism, cultura e istruzion; Lucia Dellagiacoma é stata nominèda assessora a la sanità e a la politiches sozièles e Lisanna Cincelli arà enveze la deleghes al sport, al volontariat e a la oportunitèdes pervalives. L’ombolt Giulio Florian tegn sot sie control dret duta l’autra competenzes, ma el e la squadra di 4 assessores sarà didé ence da 6 conseieres deleghé. Antonella Winterle ge vardarà dò a la parbuda di paìjes, trei conseieres vardarà a na vida più ascorta al patrimonie del Comun: Ervin Obletter a Vich, Claudio Cincelli a Poza e Luca Rasom a Pera, enveze Mara Dorich se cruziarà de la manifestazions e Luca Mazzel di raporc anter la sociazions e de artejanat.

De più su La Usc 40 di 09 de otober  (Lucia Gross)