La Usc di Ladins

Bianch e lijier desche la neif l’é chel picol spoz che da dut istà rua te poliné aló enlongia ju l Ruf de Duron. L fèsc bela parbuda con sia piumes e con chi picoi eies chières e lumenousc tel retrat che Richard Runggaldier, enciasà da passa cincant’egn a Ciampedel, ne à portà te redazion enstadì.
Chel picol ucel spevech someassa no sie albin, ajache i eies no à la tipica colorazion checena. Chel bianch pur e fora de anter porta aboncont con sé na picola magìa, chela de la natura che semper rua a maraveèr ence ti più picoi e fons detaes.
Richard ne conta con n grignot sul mus de coche l proèa da meìsc a ge fèr na foto: »L’é da dut istà che proe a fèr chest retrat. N’outa l’é vedù de fora aló da poliné, desche zenza. Coran coran é tout sobito cà la machina, ma cò é avert la fenestra l refles di raes de soreie i lo à fat sgolèr demez«.
A Richard ge sà dassen bel fèr foto a la natura e a la besties: les rua de più al cher e les fèsc sentir sie esser semplize e pazifich.
La natura con duc sie picoi tesores sconec ne sciauda l cher… speron che chel picol spoz seghite a sgolèr portan pèsc e marevees!  (Nicoletta Riz)