La Usc di Ladins

Ence chest an l’Union di Ladins de Fascia à respetà la tradizion e l’à metù a jir la Festa del Rengraziament ai 11 de otober, la seconda domenia del meis, a Cianacei, enceben duta la restrizions emponudes da la normes anticovid.
La giornèda, caraterisèda chest an da freit, tumech e sacotanta nigoles che à fat ruèr la pruma neif de l’invern, la é tachèda con la messa te la gejia del Sacro Cher; no l’é stat possibol endrezèr la defilèda, tant per via de la restrizions che per l catif temp, che à seghità via per dut l dì.
Donca duc se à troà tedant gejia e da mesa les 11 l’é tacà la messa zelebrèda da don Mario Bravin beleche duta per ladin, col bel compagnament del cor vidà da Paolo Bernard.
Te gejia sui benc, se sà ben tel respet de la regoles per l contegniment del virus, à troà post anter la autoritèdes l’ombolt de Cianacei Giovanni Bernard, l procurador del Comun general de Fascia Giuseppe Detomas, l conseier ladin Luca Guglielmi, l’ombolt de Soraga Valerio Pederiva, i vize ombolc de Ciampedel e Moena Alessandro Bernard e Cristina Donei, la presidenta de l’Istitut Cultural Ladin Lara Battisti, l raprejentant del Bim Adesc Francesco Dellantonio.  (Cristina Marchetti)