La Usc di Ladins

»No l’é pa dit che cognesse morir, fosc amò 200, 300 egn…«: con chesta paroles e con n gran grignot sul mus Giorgio Brach responea a na domana che Fernando Brunel ge aea fat te n’intervista (publichèda su La Usc nr. 13 de chest an) su la neva utia che l’aea tanche fenì de frabichèr te Duron. Chi 300 egn l Segnoredie no l’à volù ge i conzeder: Giorgio Dantone Brach, 61 egn, l’é vegnù a mencèr fora de n bel nia en mèrtesc ai 13 de otober. 

L’acort de la val Duron, l chiet di bosć e l lijier corer de l’èga ge fajea compagnìa da 12 egn en ca e con la medema pèsc l’é se n jit sun ciel. La burta neva à soscedà gran despiajer te la comunanza de Ciampedel e de duta la val: Gere Brach l’era dassen aprijià da duc per sie fèr sorì, gustegol e algegher.

Dessema con la femena Marina, che l lascia soula con la mère Miriam e la sor Fiorenza con Almo, l’era l vardian de la mont de Duron e duc chi che passèa ló ite i se fermèa con gran piajer a se fèr doi ciacoles con el, a se magnèr vèlch da bon o a se beiver zeche da ciaut, tedant fregolèr, endèna la giornèdes più freides de l’an. 

»Giorgio, tu ties co me te val Duron. Tia fegura e tie cher datol l’é n segn che restarà ti cheres de chi che te à cognosciù e che te à volù ben. […] Esser tia sposa l’é stat la roba più bela che aesse podù dejidrèr da la vita«: con chesta paroles Marina à volù saludèr sie om.

La sepoltura la é stata a Ciampedel en jebia ai 15 da mesa les trei. Sacotanta persones les se à strent dintorn a la familia per saludèr per l’ultima outa Gere Brach.   (Nicoletta Riz)