Te la piates de Fascia de La Usc di Ladins da passa 15 egn vegn publicà l retrat veie da endoinèr, l’é na rubrica che à semper soscedà gran enteress e aprijiament anter la jent, l’é sacotenc defat i letores che rua te redazion a ne portèr fotografìes da ‘chi egn’, troèdes magari per cajo te vèlch crigna de cassabanch, che nos publicon vigni setemèna.
L’é dalbon enteressant veder chisc retrac che ne rejona de vèlch che l’é stat, l’é desche verjer na fenestra sul passà, n melaur dal pont de veduda etnografich e de la tradizions.
Ti ultimes tempes te redazion l’é vegnù Graziella Dovolavilla da Penìa che la ne à portà n album de fotografìes dalbon n muie bel, che l’era stat metù ensema con gran cura da sia mère Anna Micheluzzi de Adam con su desvalives retrac de ela da joena.
N album de chi da n’outa, no n muie gran, con la piates de cartoncin scur, enterzèdes da sfoes de chèrta de seida biencia a stravardèr la fotografìes tachèdes con chi picoi triangoi adejives trasparenc a cianton, vèlch una fornida ence de na curta descrizion scrita con bela schertura con n lapisc bianch, a contrast sul sfoi scur.
Na marevea, se pisson che anché i retrac che conta de noscia vita i aon sul fonin o sul computer.
De più su La Usc 47 di 27 de november
(Cristina Marchetti)
