A chi ge dèjel d’empaz la solidarietà per la eles?

Data

26 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La femenes de la sociazion “La Voce delle donne” e de “ARTèDonna” aea fornì sù la banches te Fascia e Fiem per la dì contra la violenza su la eles, ma chela de Fontanac é stata desfata.


L’é stat na burta neva chela che la femenes de la sociazion “La Voce delle donne” à abù ai 25 de november. Ensema con la artistes de “ARTèDonna”, l projet de la sociazion, les se aea dat jù da temp, les aea pissà e lurà per portèr te la valèdes de la Veisc n segn concret tel dì contra la violenza su la eles. Les aea studià na instalazion da meter su la banches te ogne paìsc, les aea domanà domanà l’autorisazion a duc i Comuns, binà ensema dejines de ciuzé da femena e encolorii de checen, con na veta checena e n placat col numer de telefon olache la eles che à de besegn pel se oujer.

Una de la sozies – à scrit la presidenta Maria Elena Gianmoena su la piata Facebook de la sociazion - aea ence pissà de meter n sfoi con scrit “no tocèr”, ampò les se à pissà che se zachei aessa volù roinèr l messaje de solidarietà per la femenes che sopesc violenza, no aessa podù esser n sfoi con chela paroles a l fermèr. Ai 24 les se à dat jù per jir a fornir te ogne paìsc la banches de la femenes, de cheles che aane scrit ence su La Usc… Ampò sun una de chesta banches, avisa chela de Fontanac, l dì contra la violenza su la eles no l’era più ne ciuzé, ne veta, ne placat.

Chi él stat a desfèr jù dut? A chi él che pel ge dèr d’empaz n segn de sensibilisazion e solidarietà envers la femenes vitimes de violenza?

No se l sà, fosc chest l’é demò n picol at che no merita gran enrescides, ampò chi che à fat chest tant à desmostrà duta sia picoleza. L diretif de la sociazion La Voce delle Donne à moscià enveze de aer dut auter livel: te la delujion, no tant per la banca, ma per la mencianza de respet per l lurier de la sozies e per l fat che sie jent che met sia energìa per desfèr enveze che per fèr, la presidenta Gianmoena l’à dit che ampò chisc ac no à da vegnir duré per sciudèr sù contrasc’ politics che no à nia a che fèr col lurier portà inant dò e dò da la sociazion e l’à domanà de no fèr polemiches dejutoles ma de se dèr jù ogneun per l ben de duc.

 (Lucia Gross)