La Usc di Ladins

La sociazion NOI Trento, che tol ite passa 90 oratories a livel trentin, à metù a jir chest an na garejèda social per l prejepie più bel. Ence l paìsc de Ciampedel à tout pèrt… e l’é doventà n prejepie!

Ge é stat domanà a duta la comunanza de fèr a man n tòch (a partir da la majons ai personajes) e l grop di joegn l se à cruzià de embastir e meter ensema la desvaliva pèrts del prejepie. L’é stat endrezà la strutures più cognosciudes de paìsc: la gejia, l’ADEL, la caserma di studafech, la forenadoa, la scola de schi e l pech, la coprativa, la scola mesènes, l’alberch storich Agnel e l picol paìsc de Pian, olache tedò l’é stat metù ence n modelin de Saslench. Fora per la picola strèdes de paìsc śira don Mario, l capocomun, n studafech e n infermier, e amò tenc de etres. La crìpela con l Bambinel la é loghèda tel zenter de Ciampedel.

La families de paìsc les se à dat jù ogneuna per endrezèr na pèrt del prejepie. L grop de endrez à organisà i materièi, che é stac dac fora tel respet de la normatives anticovid, e la istruzions.

L prejepie vel esser de la comunanza, te la comunanza e per la comunanza, n’ocajion per fèr zeche ensema e se sentir adum, ence te chest moment de distanza.  (Nicoletta Riz)