N viac anter i colores de la Dolomites

Data

02 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La scritora da Soraga Alberta Rossi à scrit n nef liber che deida a cognoscer la lejendes, la storia, l lengaz e i personajes che à segnà noscia valèdes.
»Su la Dolomites te scontrarès i colores de sia pizes, ma ence chi del mèr che tel passà l les corìa, te empararès a recognoscer i colores de la net che doventa recam di raes de luna e chi da fech de l’enrosadira, encanteisem de n Re antich. Te entenarès i colores di leghes e di ruves, di bosć e di pré, di fiores e di èrcabuans…«

L’é l scomenz e la fin del nef liber de la scritora Alberta Rossi da Soraga »I colores de la Dolomites« dat fora tel meis de dezember da la Curcu Genovese, con la bela ilustrazions de Filippo Vinante.

N viac, descheche l lo chiama l’autora, anter i colores de la Dolomites, che doventa na imerscion totala ti colores. »Percheche i colores che caraterisea la Dolomites l’é zenz’auter l bianch de la dolomia, de la steiles da mont, de la luna, de la neif; l checen de la reses, di fiores de la sita, di sangons, del fech, del fiorir del soreie, de l’enrosadira; l brun del ciel, di leghes da mont, di schiopes, di fiores de Sèn Paul e l vert di bosć e di pré. Ma l’é l’èrcabuan con sia magìa e sia sacotanta sfumadures che ge ret a ogne pascionà de la mont duta la paleta di colores de la esperienzes che lo lea a chesta. Ogne lech se tol dò colores, recorc, perfumes, emozions, melodìes, encontres.« 

Emozions e encontres che se troa piata dò piata de chest liber che apede a dèr na cèrcia, travers la poejìes de Alberta, de la desferenta variantes de ladin de la valèdes dintorn l Sela, l met dant ence informazions storiches sui maores personajes che à segnà noscia tera e curiositèdes su la lejendes, sul lengaz ladin, su la crepa de nesc monc, su la Reìna de la Dolomites. 

N viac da color che ne fèsc lejer coi eies de la marevea i colores de la natura te ogne sie moment, te ogne sia sfumadura, te ogne sia revelazion. Chi che vèrda l mond a colores veit n mond maraveous, chel che se scon a l’èmenes fosces, ai cheres grijes. Alberta ne ensegna a veder l mond a colores, a descorir i secrec de la Dolomites encolorides, percheche ogne color à sie segnificat, sie valor. L brun no l’é demò brun e l bianch no l’é demò bianch ai eies de chi che sà lejer, vardèr e scutèr. I colores l’é oujes, i colores l’é segnes, i colores l’é vita.

I eies de Alberta à sapù veder i colores de noscia Dolomites e, travers sia enrescides e l didament de autra fontènes storiches e leterères, la i à metui a la leta de chi che tolarà te man chest liber, per l lejer fora con eie ascort, con eie da color. 

L’é soraldut n liber che se ouc ai turisć che rua te noscia valèdes ma l pel esser de enteress ence per chi stèsc te chisc lesc. La publicazion é da poder troèr te la boteighes di libres, da l’autora e ence te senta de l’Union di Ladins a Sèn Jan.

»I colores l’é i grignoc de la natura: mie augure l’é che chest liber ve fae grignolèr e che l toce vosc cher, la mior ‘bussola’ per descorir e cognoscer dalbon l’encant de la Dolomites.« Uzon fora l’augure de Alberta desche augure de Bon An 2021, che sie n an rich de colores, n an pien de èrcabuans.


 (Monica Cigolla)