La Usc di Ladins

L prum dì de l’an i bec cognea jir a se avenjer la bombona: i jìa dai nons, ma vèlch outa ence da etres parenc e vejins jà da doman bonora a ge dir sù na formula de augures. La jent de età l’à amò tel cef chesta frases, che dijea: “Bondì, non e nona, ve augure un felize capo de an, prega Idio che n auter an siede amò vives!” opuramenter “Bondì e bon an, agegher e san, con n muie de legreza e fortuna”.

La nona e l non i se aea enjignà na bela gran peta da ua passa e n fazolet o n toch de roba da brac da olache la fiocia o l fioc podea se fèr fèr fora na rocia o na ciameija.

Amò anchecondì la usanza de jia a se avenjer la bombona la vegn portèda inant da n muie de families fascènes, e al post de la peta i ciapa l bracel, fat te cèsa o fat enjignèr dal pech, e de spes ence na bonaman.

N’autra bela usanza che no è amò jita fora deldut, ma ampò la é oramai pech cognosciuda anter i joegn, l’é chela de fèr a gara per esser i prumes a ge dir “La più bela a mi!” opuramener “Bondì, bombona a mi!” a chi che se veit o se sent per i augures.

La reisc de chesta usanza ne disc che i joegn l dì de Nanef i se sconea tedò vèlch ciuch e canche passèa na tousa l prum che dijea “la più bela a mi” l o la venjea la bombona. Per i fenc che aea la moroja la gaissa era amò più grana: valgugn per se avenjer la bombona i spetèa che la moroja vae te stala a moujer. I se n stajea sconec n bon pez per poder ciutèr fora sul più bel a ge cridèr “la più bela a mi!”; etres adertura i spetèa fora da fenestra e te chela che i vedea che la moroja aea empeà la ciandeila i ge cridèa ite per fenestra “La più bela a mi!”