La Usc di Ladins

Del 2020 jìa fora i mandac di raprejentanc di Consees de comun e del Comun general de Fascia: se no fossa ruà l Covid chest segur l fossa stat l’event più emportant e de peis de l’an.

La litazions era pervedudes ai 3 de mé e la desvaliva formazions politi­ ches aea jà tacà a se troèr per meter jù e lurèr fora i programes, se aea ence jà sentù vèlch ousc sui candidac possiboi, per l’encèria de Procurador l’era ciutà sù i inomes de Michele Anesi e Armando Bez. Ampò l’emergenza sanitèra à ferà dut e fat sperlongèr la litazions a na data da definir.

De messèl l’é stat fat a saer che la litazions de Comuns e Comun general fossa states ai 20 e 21 de setember, ensema con l referendum costituzionèl sul tai di parlamentères e sobito l’é scomenzà l lurier per ruèr a meter ensema la listes, che cognea vegnir prejentèdes inant la fin de aost, tel pien de la sajon turistica da d’istà.

Doi contendenc e cater listes per l Comun general

Dò doi mandac de femenes, con Cristina Donei e Elena Testor a l’encèria più auta del Comun general, chest’outa l’é stat doi omegn che se à metù a la leta per l’encèria de Procurador. Da na man Giuseppe Detomas, sostegnù da la »Neva Ual« e la lista zivica »Uniti­Adum per Fascia«, da l’autra l joen Matteo Iori, jà Conseier de Procura del CGF te l’ultima legislatura, portà inant da la lista »Fassa« e da »Auto­ nomisti Popolari« tolan adimprest l simbol del partit del president del Consei provinzièl Walter Kaswalder.

I é stac de 6080 i sentadins fascegn jic a litèr (l 76,3% de chi che aea derit) e l 52,22% à cernù Giuseppe Detomas, che l’à vent con 2872 stimes, 244 de più che sie contendent Matteo Iori che l n’à concostà 2628. Jai 5 egn la lista Fassa con Elena Testor aea vent su la UAL con Manuel Farina demò per 38 stimes.

La pruma declarazions di doi contendenc à fat entener che l’aministrazion de la maora istituzion de Fascia aessa podù jir inant tel segn de la cordanza e del respet, pur de la desvalivanza de idees e Detomas l’à dit sobito de fèr cont su na bona colaborazion con duc i Comuns per poder ge dèr sbunf al Comun general.

De più sui vèresc politics e istituzionèi te Fascia fora per l'an 2020 é da poder lejer su La Usc stampèda de vendei prum de jené.