La Usc di Ladins

N pach pien de solidarietà. N aiut concret e atif per 300 families de Fascia, e medemo l’é stat fat per autertanta families di raions del Primier e de Belun, n sostegn alimentèr per chi che te chest moment storich particolèr se à troà en dificoltà.

La Cassa Rurala Dolomites à pissà n projet inovatif per no lascèr soules la families più sensiboles.

»Nesciugn cognea restar endò e coscì la Cassa à fat descheche se fasc te na gran familia, soscedan l’intervent de valch realtà de volontariat che raprejenta na re soziala a protezion di più deboi – à deschiarì l president Carlo Vadagnini. Le familie é state contatade dai volontadives da le sociazion del teritorie su nosc envit «.

Per la Cassa l’empegn per l’assistenza sozièla de la popolazion te chest moment de emergenza sanitèra e economica l’é tacà jà l’aisciuda passèda col didament a ospedèi, cèses de paussa e envers chi che era en pruma linia.

N empegn che va inant e che seghitarà ence tel davegnir se sarà de besegn.

N percors dessegnà da cher datol, solidarietà e volontariat.

»L’obietif é portar inant ence autre scomenzadive de sostegn, ma soraldut cognoscer e capir i besognes reai di sentadins – l’é jit inant l president de la Cassa – percheche le familie é i pilastres de noscia comunità e te la situazion che vivon ancöndì l’é benfat ge dèr atenzion e cura.«

La Cassa Rurala Dolomites à jà dat fora a la fin del 2020 n prum toch de 30.000 euro spartii fora a na vida pervaliva sui trei teritories olache opera l’Istitut: 10.000 te Fascia, 10.000 tel Primier e 10.000 tel raion de Belun.

»Sion vertesc a dar fora autre ressorse se l’é de besogn«, l’à serà sù Vadagnini.