La Usc di Ladins

L’é temp fin ai 25 de jené per la iscrizions a la pruma clasc di scolees che con l’an de scola 2021/2022 taca ite la scola populèra o la scola auta. L’iscrizion cogn vegnir fata online da un di genitores o da chi che à la responsabilità genitorièla travers l’azess al portal www.servizionline.provincia.tn.it - area infanzia, scuola e formazione - iscrizions - tras SPID.
Da chest an, per fèr a na vida che duta la prozedures sie medemes e ence per via de l’emergenza Covid per presservèr la sanità de duc, la Jonta de la Provinzia de Trent à stabelì che ence l passaje al prum an de la scola mesèna cogn vegnir confermà travers la medema prozedura online. Ence i genitores di studenc de la clasc quinta de la populères cognarà donca jir sul portal di servijes online per la conferma de iscrizion se l fi seghita a jir inant te la scola del medemo istitut o per na neva iscrizion se l muda istitut de referiment. La mesènes de referiment per i sentadins de Moena e Soraga l’é Moena, per i sentadins de Sèn Jan e Mazin l’é Sèn Jan e per i sentadins de Ciampestrin, Fontanac, Ciampedel e Cianacei l’é la mesènes de Ciampedel.
La Scola Ladina de Fascia fèsc a saer che la domanes de iscrizion de studenc a scoles fora da l’istitut de referiment pel vegnir toutes sù se amancol un di doi genitores laora te chel comun olache l’é stat fat domana, se l stèsc te chel comun o se stèsc i giaves che cogn ge stèr dò al scolé canche i genitores laora. 
I ofizies de la Scola Ladina é a la leta per ogne informazion. Conscidrèda la situazion de emergenza sanitèra l’é semper miec manèr na mail a alunni1ciclo@scuoladifassa.it o telefonèr al numer 0462 760340 (ofize scolees) dal lunesc al vender da les 8.30 a les 11.30, l mercol ence da les 14.30 a les 15.30.