Daniele Verra l’é n joen de 28 egn da Cianacei che dò la ragionerìa l se à laureà a Trent en letradura moderna, ajache lejer e scriver ge sà più bel che fèr conts. L laora te l’hotel de familia a Cianacei, l colaborea con la redazion de La Usc di Ladins e l’à lurà te Istitut Cultural Ladin per l’archivie, lurier che ge à piajù tant da fèr la tesi sul fondo de P. Frumenzio Ghetta.
Chest’aisciuda l se à pissà n projet, l ge à lurà dò per 6 meisc e ades l ne porta dant l frut garatà de sie empegn: n liber particolèr, per contèr n temp particolèr:“ M.J. Viver al temp del malac", dat fora da l'Union di Ladins de Fascia.
I autores
Daniele Verra se à pissà de fèr 10 capitoi e l ge à dat na curta descrizion de l’argoment de vigni capitol e de la carateristiches di protagonisć a duc i autores che l'aea troà fora e engaissà a scriver per ladin: Mauro Lazzer, Alison Prinoth, Luana Tomasi, Matteo Iori, Nicoletta Riz, Valentina Ghetta, Consuelo Tomasi, Stefano Riz e Sebastiano Dorich. A serèr sù l’é Daniele Verra, che l'à fat dapò ence la traduzion de dut l liber per talian
L’é da recordèr ence i doi joegn fascegn Stefano de Pinto e Ismaele Soraperra che i à realisà la fegura de soracuerta che ne moscia na Mary Jane te na scena veta e straneousa, zenza mus, percheche duc podassane esser Mary Jane, ma con n fior che troa lèrga sul vis per simbolisèr i ensomesc e la speranzes che renasc che dò l vet.
Su La Usc stampèda de vender ai 15 de jené se pel lejer l'intervista a Daniele Verra, che ne rejona de chest liber e de sia pascions.
N nef liber su la vita te Fascia al temp del virus
Daniele Verra à portà a compiment n bel projet: 10 autores, con 10 capitoi te 2 lengac, conta n temp de vita de M.J., sia familia e si amisc te Fascia, con emozions e sentimenc universèi.
Galaria retrac
View the embedded image gallery online at:
https://www.lausc.it/valedes-ladines/fascia/14548-n-nef-liber-su-la-vita-te-fascia-al-temp-del-virus#sigProId1e6037aa82
https://www.lausc.it/valedes-ladines/fascia/14548-n-nef-liber-su-la-vita-te-fascia-al-temp-del-virus#sigProId1e6037aa82