L’é stat n scomenz de l’an dalbon rie chest per Fascia, che te na setemèma l’à perdù doi joegn maestres de schi endèna che i era da mont su con la pouses. Per doi outes te na setemèma i omegn del socors é stac alerté per portèr didament, e duta doi la outes a aer besegn de aiut l’era n compagn, un del paìsc che i cognoscea, ma duta doi la outes l’empegn, l sforz e la fadìa no à joà a i salvèr.
En sabeda ai 16 de jené, dò che de n muie i se aea binà a Ciampedel, fora da gejia, per ge fèr n ultim braciacol a Etienne Bernard, l’é ruà la burta neva che nience Federico Costantino no l’é stat bon de ge fèr la outa, dò na setemèna da l’azident.
Federico Costantino l’aea 40 egn e doi bec pìcoi, ta Dèlba l portèa inant n picol alberch con sia femena Alice e l restorant pizerìa Resolé con sie fra Giuseppe. L’era maester de schi e l jìa trop con la pouses, con gran pascion e braùra, ma en vender ai 9 de jené, endèna che l vegnìa ju de Contrin, l’à perdù l control di schi e l’é sutà jù con n saut de n bon pec de metres, ruan a dèr ite sech te n èlber. Enceben che zachei aesse vedù l’azident e chiamà sobito l socors, che te 10 menuc l’era sul post e de fata l’à podù l portèr te ospedèl a Trent, i colpes ciapé e l freit aea fat n dan tant pesoch che se à vedù sobito che la situazion era grieva. L lumin de la speranza é ampò restà empeà amò per na setemèna, ma en sabeda ai 16 l se à destudà.
(lg)
N’autra grieva manconia te Fascia
Federico Costantino no se à salvà. Tel dì che la val con gran dolor ge à dat l’ultim salut a Etienne Bernard, l’é ruà la burta neva da Trent.
Galaria retrac
View the embedded image gallery online at:
https://www.lausc.it/valedes-ladines/fascia/14549-n-autra-grieva-manconia-te-fascia#sigProIda14de9fd6c
https://www.lausc.it/valedes-ladines/fascia/14549-n-autra-grieva-manconia-te-fascia#sigProIda14de9fd6c