La Usc di Ladins

Aldò de la ultima desposizions del goern, ence l Museo Ladin de Fascia à podù endodanef orir si ujes a la jent, respetan mesures de segureza pervedudes.

Te chisc tempes senestres per duc, l staff é a la leta per duc i fascegn che vel se emprevaler del temp desponìbol per se fèr na raida te la sales espositives dal lunesc al vender da les 3 domesdì a les 7 da sera e l’é avert ence l bookshop olache se pel troèr duta la publicazions, ence cheles vegnudes fora ti ultimes meisc, desche l Calandèr Ladin 2021, Luli e i Colores, Mondo Ladino e trop de auter.

Anter l’auter chi che no i à amò abù l met i podarà jir a veder la neva instalazion multimedièla enjignèda tel meis de mé del 2020 te l'ultima sala del Museo, co la proiezion sun maxischerm de n filmat su na contìa »La vivana e l cian«, che porta dant la più arcaica tradizion de Fascia, fata de sons, inomes e divinitèdes misteriouses, che ciapa endò vita co l’aiut de la moderna tecnologìes audiovisives.

 (lg)