La Usc di Ladins

Sarà Paolo Grigolli l nef diretor generèl de l’Apt de Fascia. L tolarà l post de Andrea Weiss che jirà en penscion col meis de messèl. La selezion del nef diretor de l’Apt la é stata via per l meis de dezember da na comiscion metuda sù aposta con ite: Fausto Lorenz, president de l’Apt, Elisa Maccagni, vizepresidenta, Patrizio Prandi, conseier, Andrea Weiss, diretor, e, desche comissères da fora Laura Salomoni, esperta de ressorses umanes e scouting del personal e Daniele Dezulian, espert de turism. Al concors se à prejentà 15 candidac. La comiscion à valutà 4 persones che responea al livel de competenzes domanèdes tel bando de selezion e l’à dezidù, duc chenc d’acort, che Paolo Grigolli l’é la persona più adatèda a corir l’encèria. Dachelanvìa l Consei de Aministrazion, te sia sentèda di 30 de dezember del 2020, dò aer sentù l’ejit di lurieres de la comiscion, à deliberà l contrat de assunzion. Se trata de n contrat a temp determinà per doi egn, con la possibilità de l sperlongèr amò per n an, con scomenz dal prum de oril del 2021. Ti meisc da oril a jugn Paolo Grigolli l lurarà apede al diretor Andrea Weiss.

Paolo Grigolli l’é cognosciù te Fascia ajache desche diretor de Tsm (Trentino School of Management) del 2017 l’à tacà ite na percacenta colaborazion con l’Apt de Fascia.

Grigolli l’à na laurea en economìa e comerz a l’Università La Sapienza de Roma, n Master en marketing di servijes, l’à concostà ti egn desvaliva esperienzes de lurier te la Tèlia e foravìa, diretor de l’Azienda spezièla de la Cambra de Comerz e dapò diretor de la Scola de Management del Turism de Tsm. »L’é na endesfida profescionèla e umana – à dit Paolo Grigolli – che tole sù con gran gaissa per desvaliva rejons. Prum de dut percheche con Tsm é jà lurà con l’Apt de Fascia e aon envià na percacenta colaborazion ence con desvalives operatores de la val che me spenc a jir inant col percors tacà ite ensema. Fascia l’é la destinazion de la Dolomites per ezelenza donca chest dèsc amò più gaissa per pissèr a n sie svilup tel davegnir, ence vardan ai mudamenc che à portà la pandemìa. Amò apede me piajessa smaorèr e valorisèr la ressorses de na squadra te l’Azienda con l’obietif de la troèr amò più competenta e capaze a la fin de mie mandat.«  

 (Monica Cigolla)