La Usc di Ladins

La svizra Lara Gut Behrami venc la pruma libera de Copa del Mond de eles su La VolatA. La garejèda de anché, vender ai 26 de firé, à metù al luster la carateristiches del portoi sun Sèn Pelegrin olache per la pruma outa l’é stat endrezà na garejèda de Copa del Mond. N portoi n muie asvelto, adatà a la atletes che sgola sui schi, con doi bie sauc al scomenz e a la fin, che à cognù vegnir bagnà per tegnir fora l ciaut de chisc dis. Na giornèda spetacolèra che à sport imagines de ezelenza.

Lara Gut Behrami à sapù desfrutèr al miec l portoi de Col Margherita e l’à moscià endodanef sia gran forma, dò i resultac da podie de Cortina. Ades la é a cef de la classifica generèla con 1047 ponc, l’à passà via Petra Vlhova che à 1018 ponc. Al secondo post l’é ruà l’austriaca Ramona Siebenhofer e al terzo post l’autra svizra Corinne Suter. La pruma de la taliènes l’é stat Laura Pirovano, ruèda 8^, dapò l’é Elena Curtoni 11^ e al 16° post l’é la gherdenera Nadia Delago a 1’’59 de destach da la pruma. Nadia Delago la é ruèda dant da Federica Brignone per demò 1 centeisem.

Al 21° post l’é ruà Francesca Marsaglia, al 28° Marta Bassino, al 33° Roberta Melesi e al 38° se à classificà n’autra gherdenera Teresa Runggaldier, che à fat anché sia pruma garejèda de Copa del Mond. Doman, sabeda ai 28 de firé, l’é la seconda libera con scomenz da les 11.00. Se pel la veder en direta su Rai 2, Rai Sport e Eurosport.  (mci)