Ai 20 de firé del 1810 per man di franzousc a Mantoa vegnìa fujilà l gran combatent Andreas Hofer che à dat la vita per tegnir dalenc da noscia tera l potent Napoleon.
A Mantoa, tel sit dit Porta Giulia l’é stat fat n vidor per recordèr l post olache Andreas Hofer l’é mort e da n muie de egn en ca, ai 20 de firé, la compagnìes di Scizeres del Tirol storich ensema a la autoritèdes de la zità, se troa te chel vidor per na zerimonia de recordanza.
Chest an per via del malac del Covid chest moment coscita fon e de gran valuta no à podù vegnir fat. La compagnìa di Scizeres de Fascia à coscita pissà de pojèr na gherlanda de dasces aló dal capitel de Chiusel, su la strèda per jir forin mont da Vich pech sora Tamion.
L capitel de Chiusel l’é dedicà a la Mère de l’Aiut e l’é stat fat su tel temp de l’invajion franzousa. La devozion a la Madona de l’Aiut la era n muie fona e forta te dut l Tirol donca ence te Fascia e l’era fazile veder te la stues, vejin al Crist, ti capitìe e te vèlch gejia, ence copies de chest bel chèder. Donca no l’é da se n fèr marevea che l capitel de Chiusel l sie stat dedicà a la Mère de l’Aiut ajache aló l’é n post belebon pericolous da passèr. Aboncont soraldut l’é stat fat sù percheche aló i franzousc che volea vegnir te Fascia no i é più stac bogn de jir inant dachelanvìa no i é rué te val. Chest capitel l’é stat fat sù da la jent da Vich apontin per ge dir develpai a la Madona de i aer fermé.
De più su la storia de chest capitel é da poder lejer su la Usc stampèda de vender ai 26 de firé. (Annelise Vian)
I Scizeres de Fascia recorda Andreas Hofer
Tel dì de sia fujilazion i Scizeres de Fascia à portà n segn ló dal capitel de Chiusel per no desmentièr noscia istoria e nesc veies che à combatù per stravardèr Fascia dai franzousc.
Galaria retrac
View the embedded image gallery online at:
https://www.lausc.it/valedes-ladines/fascia/14966-i-scizeres-de-fascia-recorda-andreas-hofer#sigProIdfc2e547051
https://www.lausc.it/valedes-ladines/fascia/14966-i-scizeres-de-fascia-recorda-andreas-hofer#sigProIdfc2e547051