La Usc di Ladins

Doi neva produzions de l’Istitut Cultural Ladin é ruèdes enstadì sun nosc desch. Se trata de doi libres che é stac stampé jà l’an passà e che ampò, fazile a causa del Covid, i no é amò stac dac fora e prejenté ofizialmenter. Doi publicazions deldut desferentes, ampò duta does con aspec de gran valuta per duc chi che à enteress per la cultura e l lengaz.

Coche la é stata che son ruà sul Bal di Ladins l’é na contìa da carnascèr scrita da Hogo de Rossi del 1905, na patòfia da grignèr che era stata publichèda te Mondo Ladino del 1982, ma mai data fora a na vida autonoma e ades la é a la leta coi dessegnes dal trat ironich del joen dessegnador fascian Lorenzo Barbolini.

Mondo Ladino del 2020 segna l 44° an del boletin scientifich de l’Istitut Cultural Ladin. Chest numer é stat rencurà dai componenc del Comitat de redazion Gabriele Iannàcaro, Paul Videsott, Vittorio Dell’Aquila e Cesare Poppi con l coordenament de Evelyn Bortolotti e l regoi studies academics scric en onor de Fabio Chiocchetti, che à rencurà chesta revista dal 1978 en cà e ti ultimes  20 egn desche Diretor responsabol, e col 2020 l’à fenì sia encèria. Per chest na lingia de amisc de l’ex diretor à volù ge dedichèr si scric te chesta ‘miscellanea’, descheche se usa fèr tel mond academich.

De più su La Usc stampèda dei 26 de firé.  (Lucia Gross)