Cognoscede El Pech? Ei, la boteiga storica de pan te mez paìsc de Vich. Ma da pech l’é ence n auter post che à inom El Peck (chest’outa con la k percheche autramenter i lo lejessa ‘Pesc’), pissave adertura tel Vietnam.
Alessio Rasom da Vich, fi de Luigi, patron belapontin de la boteiga del pan, ai prumes de firé l’à avert ensema a soa femena a Tran Phu, tel zenter de Danang, n picol restorant dut so olache l sporc piac de la tradizion taliana ma ence cerce de magnares tradizionai fascegn.
Alessio, dò aer viajà per lonch e per larch te n muie de Paìjes, l’à zacan metù reisc. L se à stabelì a Danang, sul mar, e ensema a Binh che la é vietnamita, i à metù sù ence familia. L’an passà de firé l’é nasciù la pìcola Petra An Mai. Petra, descheche aea inom la mare de Alessio.
La pascion per la cojina l’é stat la spenta a verjer chest nef restorant olache Alessio l se à jà fat cognoscer per la calità de si piac, per i saores particolares ajache l conjobia desvalive sort de prodoc. Da la sala se pel veder coche Alessio met ensema si piac e l’atenzion che l met a i prejentar delvers.
Descheche se pel entener da l’inom che l ge à dat a so restorant, Alessio no l desmentia soe reisc e da olache l vegn e tel Vietnam l se à fat cognoscer anter i miores chef.
Su La Usc stampada de vender ai 26 de firé se pel lejer l'intervista olache l ne conta dut e se pel veder ence i retrac de sie restorant e de la picola Petra. (Monica Cigolla)
El Peck, n picol restorant fascian tel Vietnam
Alessio Rasom da Vich stasc con soa femena Binh e la picola Petra a Danang, na zità sul mar. Chiò l fasc cognoscer la cojina fasciana ajache no l desmentia soe reisc.
Galaria retrac
View the embedded image gallery online at:
https://www.lausc.it/valedes-ladines/fascia/14968-el-peck-n-picol-restorant-fascian-tel-vietnam#sigProIdc9fea34fe4
https://www.lausc.it/valedes-ladines/fascia/14968-el-peck-n-picol-restorant-fascian-tel-vietnam#sigProIdc9fea34fe4