La Usc di Ladins

L é jà da n trat che i neves magasins del Fassa Ingross per la gran distribuzion de la Coprativa de Fascia a Sèn Jan, i é atives. I lurieres era peé via del 2019 e, enceben penalisé dal Covid, i se aea serà su per da Nadèl del 2020. N gran investiment de 5 milions de euro, ma i obietives che la Coprativa se aea metù dant con chest projet é jà stac passé via debel. 

I dac é stac porté dant dal diretor Luca Giongo (v. box) en vender ai 25 de otober, en ocajion de n open day spezièl, olache i ujes del Fassa Coop é stac averc a duta la comunanza en ocajion de la avertura ofiziala e la benediscion. Ma a deschiarir l segnificat fon de chesta giornèda l é stat l president Norbert Bernard, te sie intervent dut per ladin. I numeres i é emportanc, l à dit, ajache a la fin del an la soma cogn aer l color vert, e sun chest podon segur esser contenc, ma la rejon de chest gran lurier l é stat ge dèr n servije mior a noscia val, a so setor economich, ai imprenditores fascegn e al turism.

De più su La Usc stampèda de en jebia ai 31 de otober.  (Lucia Gross)