La Usc di Ladins

Desche oramai da tradizion en jebia ai 4 de dezember se à binà i Studafech volontères per festejèr la patrona Sènta Bèrbola. Chi del Distret de Fascia i se à troà a Ciampedel e chi del Distret de Fiem, de chel che fèsc pèrt l grop de Moena, se à binà enveze chest an proprio te chest paisc. 

Dantfora l é stat la zelebrazions religiouses. Te gejia di Sènc Felip e Giacum don Mario Bravin, che l é ence vize ispetor de Fascia, à ofizià na bela messa recordan la fegura de la Sènta martire e prean per duc i studafech. A Moena l é stat don Gianni Damolin che à dit messa te gejia de Sèn Vile olache à tout pèrt ence i raprejentanc de l’autra Forzes del Orden e de la Protezion zivila.

Dapò duc i volontères se à spostà te la scoles de paisc per n moment de rengraziament e la consegna di recognoscimenc.

Su La Usc stampèda de vender ai 13 de dezember, podede troèr i dac su l'atività del distret, i inomes de duc i premié con n muie de retrac e n apel uzà fora dal ispetor Alessandro Pellegrin su la app ofizièla del numer european de emergenza 112. L’à inom ‘Where Are U’ e la pel vegnir desćiarièda sul fonin per contatèr tel besegn i socorsc.


 (Monica Cigolla)