I picui comugn del Veneto i é stai mitui n dificoltà da le restriziogn liade al coronavirus, gauja i puoz servije che se pol ciatà ntel comun e che spenz la jent a se tramudà nte chi auter paisc per avè azes a boteghe o servije fondamentai che no l é ntel suo. Nte n document de la Fondazione Think Tank Nord Est i Comugn pi n dificoltà i é 115, spartii fora n fasse de color ros, arancione e jal (i stes color de la telenovela che no finis pi per catalogà le Regiogn conforme la situazion sanitaria liada al Covid-19): i servije che é o che mancia ntel comun e che é stai considerai per sta classifica nia bela l é scole, poste, banche, farmacie, edicole e tabachign e boteghe de roba da magné.
Nte la fassa pi critica, chela
rossa, l é incia l comun da Col, ulà che peja l fato de no avè le scole – sarade oramai da pi de vintizinch agn -, né na farmacia, né na banca: ma almanco l é n bar che vent giornai e doi che vent tabach, na botega che vent roba da magné e ben rifornida incia de masarie da laor e le Poste, mantignude davarte cuater di a la stemana darè che l Comun da Col auna a auter trei comugn del Belumat i ava vinto n ricorso contra le Poste che le voleva riduje l orario. Siebe l comun da Fodom che chel de Anpezo inveze no i à de sti problemi e no i toma ite nte la classifica, ulà che però l é ite debota mez i comugn de la provincia de Belum (27 su 61) e ulà che la maor part la é raprejentada dai paisc da mont de duta la Region.
L president de la Fondazion, Antonio Simeoni, l à regordà come che nte dut sto periodo che l Veneto l eva zona arancione tanc de zitadign de sti paisc i é stai costreti a jì fora da suo comun per duorà i servije de baje che i podeva ciatà domà nte chi apede, ma che chest l demostra come che n sistema con comugn cujì picui no l posse pi jì inavant e s’abe da pensà de mete auna i comugn per miliorà i servije e fà che le zone pi dalonz i abe maor oportunità. Noi de la Usc sion jui a i domandà al capocomun da Col Paolo frena “Bonata” sua punion su n cheste dichiaraziogn.
(ciataré l'intervista intiera su la Usc de vender ai 5 de febraro)Martino Pezzei
