"Partnership strategica"

Data

23 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dan n struf òven audì che la familia Bernardi dl Hotel Baga de Sureghes ëssa vendù si Hotel Alpina Dolomites sun Mont de Sëuc. La critiches jiva de viers dl "vënder via l ncësa", do che l fova unì spustà cubatura de n auter hotel sun Mont de Sëuc. Nia puecia critiches ne ti fòvel ntlëuta nce unì fat al Chemun de Ciastel.
Tl comunicat stampa dl’Alpina Dolomites vëniel dit che l se trata de na "partnership strategica cun la grupa nternaziunela HPL Hotels & Resorts," cun la familia Bernardi che à cuotes tla sozietà nueva dl hotel. Ciunes che ie la cuotes ne vëniel nia dit tl comunicat stampa, ajache "la doi pertes à sotscrit n pat per tenì resserveda la cuota de partezipazion". Ma da coche l ie unì dit tl Mittagsmagazin dla RAI iel unì vendù l 90% dla cuotes ala grupa nueva, per 40 milions de euro.
Hugo Bernardi resta inant la persona de referimënt, da coche l dij, si fëna ie ënghe tl management dl hotel y oradechël, da coche l vën inant dit, ti dà la strutura da lëur a truepa jënt da tlo. Tl comunicat vëniel auzà ora che "cun la partnership cun la dita che à si sënta a Singapore, la HPL Hotels & Resorts, ie la familia Bernardi cumpatrona y reprejenteda te cunsëi de aministrazion dl’Alpina Dolomites srl, y l ie nscila mesun a ti jì do ala finamira de nternaziunalisé l hotel, sibe dal pont de ududa dl marketing che nce dl mesun de lascé pro stages y furmazion de si cunlauradëures da tlo te strutures de hotelaria te dut l mond."

David Lardschneider

FOTO:
L Hotel Alpina Dolomites sun Mont de Sëuc.

Galaria retrac