La Usc di Ladins

Tla curtina de Urtijëi iel stat la prima supeltura per na persona de religion islamica.

Cun la multiculturalità che l vën a s’l dé te nosc raions, iel nce for plu y plu persones de religions desferëntes che viv te nosta valedes, cun si usanzes y rituai religëusc.
Nce sce n se à dessegur bele fat vel’ pensier ti Chemuns y tla Pluanies, dantaldut per chël che à da n fé cun l cajo de mort de persones de n’autra religion, coche chëla islamica per ejëmpl che ie scialdi prejënta, ne n’iel mpo no mei stat n cajo cuncret. La ie nscila ajache i mussulmans se cruzia bele danora, tres na assegurazion mé per dì, che l corp posse unì menà de reviers a cësa per unì suplì iló aldò dla usanza de si religion.
Mbën, per n ël de 77 ani, che stajova a Urtijëi pra si mut, che lëura tlo bele da plu ani incà, ne n’ie chësc nia stat mesun. De gauja ie stac i trasporc desdii pervia dla crisa dl coronavirus. Da dì iel nce che te si religion ne n’iel nia lascià pro de brujé i morc, cie che à nce cumplicà la situazion.
L Consulat dl Marocco tla Talia se à nsci cruzià deberieda cun l fi, che l ël posse unì suplì a Urtijëi. I ti ie stac scialdi recunescënc al Chemun y ala persones nteressedes che chësc ie stat mesun.
L ie unit adalerch n si servisc de supeltura cumpetënt per zitadins de religion islamica y deberieda cun i reprejentanc dl Consulat y chëi de familia, cunliei tl medemo mumënt tres live streeming cun la cumenanza mussulmana, ie l berba dl Marocco unì metù ju te fòssa cun na pitla funzion. Aldò dla tradizion dl islam ie l ël unì suplì te na pusizion a custëi a na maniera che l cële de viers de La Mecca.


UK