Biblioteches daviertes

Data

20 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Doi mënsc ie la biblioteches publiches de Gherdëina restedes stlutes. Da n lunesc incà iel inò mesun jì a se crì ora n bel liber, sambën respetan la regules de igiena y de destanza. L tëmp de dsareda à la bibliotecheres nuzà per cataloghisé truep libri nueves.

Giut alalongia à la jënt de Gherdëina messù resté zënza liber, avisa te n tëmp ulache n ëssa povester abù plu dl’aurela de liejer che zënza.
Nscila ie l servisc che la biblioteches ti à pità ala jënt, de ti mené i libri a cësa, unì tëut su cun gran plajëi. Chësc servisc vën, nce do che la biblioteches ie inò daviertes, tenì inant dantaldut per persones che ne va al mumënt plu gën mo nia tl luech.
Ntant à la bibliotecheres njenià ca la biblioteches a puntin per garantì la segurëza di letëures. Na scipa de prutezion ie unida metuda su y i stuei ie unii tëui demez.
I libri y media che vën purtei de reviers vën metui n carantena trëi dis alalongia. Te Sëlva réstel inant na cassa dan porta da mëter ite i libri da reter, zënza che l sibe de bujën de jì ite.
La sala da liejer la zaites ne possa nia unì nuzeda, nsci ne vëniel ntant nce nia cumprà la zaites da uni di. La revistes pòssen sambën se mpresté ora per ti cialé a cësa.
Mé tla biblioteca a S. Cristina iel unì metù a despusizion cater mëises despartides una dal’autra per se liejer la zaites da uni di y tlo iel oradechël nce de bujën de se tré sëura manëces per respeté la normes de igiena scrites dant.
 
Diesc al iede possa ite
La mascra ie de ublianza per duc i vijitadëures, 10 persones al iede possa vester te biblioteca. Perchël vëniel prià bel de se tenì su l manco giut puscibl te biblioteca, per ti dé la puscibltà a duc de se mpresté ora vel’ bel liber. L orar de giaurida dla Bibliotech San Durich y dla Bibliotech Tresl Gruber resta inant l medemo, ora che de dumënia, ulache la biblioteca de Urtijëi resta ntant dsareda. La Bibliotech Oswald von Wolkenstein de Sëlva gëura cun n orar scurtà da n lunesc ai 18 de mei inant (per i orares dla biblioteches cialé nce sot ala plata dla nfurmazions).

La azions de liejer va inant
Scialdi da muië iel stat a desdì la manifestazions che fova ududes dant per d’ansciuda y d’instà. Ma la azion de liejer d’instà per mutans y mutons dala elementera inant ne mancia nia. A Urtijëi iela chëst ann mpue autramënter che i ani dant, l vën metù a jì na sort de bingo. Dai prim de juni inant possa la mutans y i mutons se mpresté ora i libri per fé pea pra chësta azion. Tl’autra doi biblioteches, a S. Cristina y te Sëlva, iesen tl lëur de se mpensé ora n’autra blòta azion de liejer d’instà per i sculeies, che scumencerà ai 15 de juni.

UK

FOTO: Tla biblioteches de Gherdëina iel inò da garat na bela vela de libri nueves.