La Usc di Ladins

La cëces - per tudësch "Zecke" o per talian "zecca" - se trapina te luesc for plu alauta. Chësc ràten ie gaujà dala temperatures plu ciaudes nce a na majera autëza

L se trata de na sort de parassit che viv dl sanch che l ti ciucia ora a n tier o a na persona. Dala cëces se tëmen dantaldut ajache les possa dé inant malaties nce periculëuses coche la meningit o la boreliosa. L ie n nset che se muev inant scialdi plan y ie mé bon da cramé su nchin a na autëza de n meter y mez zirca. Per l solit stàl sun na plecia o n fil de ierba y apieta che zachei l strëfle ju. Ruvà sun la persona o tier, se fìcel ite tla pel y ti ciucia ora l sanch. Si pic ne fej nia mel y ne fej nce nia nfezion perchël ne se ntënden nce de nia. Mplu ie la cëcia scialdi pitla, tan granda sciche n cë de na dluva o nce mëndra y ie perchël scialdi ria da udëi, permò canche la ie mbueda ite de sanch vëniela majera.
N fova dla minonga che tlo da nëus ne n'iel nia chësta sort de cëces che va sun la perona. Ma ultimamënter ti iel suzedù a doi jëuni de Urtijëi che i ie unii picei da n tel nset y chësc nia oradecà ma propi tl luech.
Sun Col de Flam se ài sentà ju te n pra sià, sun na chëutra. Ntendù se à l jëunn de 15 ani permò da sëira canche l à urtà a se crazé, zaran ora nsci la cëcia. I genitores che jagova de cie che l se tratova à po' cris ju dut l corp dl mut y n à abinà mo na desëina y mesa. Mpue sprigulei per chësc fat iesi sambën jic dal dutor, y ajache l mut à giapà fiëura pona nce te spedel, ulache l ti ie unì spiegà co tenì sot a cuntrol l jëunn. Nce la jëuna che fova pea à sun na tela cialà do y à ënghe abinà cëces ficëdes ite te si pel, ma scialdi de manco y ne n'à da dedò nce no abù fiëura o vel' auter problem.

Ti damanderon proscimamënter nce a n dutor cie che l se n dij de chësc fat, coche n fej a les recunëscer y coche n possa se paré da chësc parassit.

UK

FOTO
Na cëcia. (Foto: youtube)