La Usc di Ladins

Ntan iesen bele tl lëur de njenië ca la sajon nueva per l FC Gherdëina, cun l travert de jì su de categuria. Nstadì iel stat la prejentazion ufiziela dla prima scuadra y dla categuries di jëuni y mutons.

N sada de chëst’ena passeda à l FC Gherdëina prejentà si scuadres per i campiunac 2020/21. Bele l ann passà òven coche travert chël de vëncer l campiunat de segonda categuria, ma l coronavirus ova fat jì ala nia chësc sëmi. Tl scumenciamënt de merz fova l FC Gherdëina sun la segonda posizion te campiunat y tla semifinela de Copa, ma l covid ti ova tëut l mesun de finé l turnoi y de arjonjer la prima posizion.

Prejentazion ufiziela nstadì te Sëlva
Nce chëst ann ne mùdel nët nia pra la prejentazion ufiziela dl FC Gherdëina: l presidënt Alfred Runggatscher ie for plën de energia positiva y segur che cun chësta scuadra pòssen arjonjer n travert mpurtant. Sce n ova bele l ann passà dit de ulëi vëncer l campiunat, pona resta chësc sëmi for mo vif. Tla ultima sajon fòven scialdi daujin, ma l sport ova messù se fermé sun dut l mond. Mpo ne n’ie la ueia de fé inant nia morta y l team dl FC Gherdëina lëura bele inò per la sajon nueva.