La Usc di Ladins

N merdi sëira iel ntant unit ora i prim resultac, parziei, dl test dl sanch per anticorps al personal nseniant y nia nseniant dla scola te duta la provinzia de Bulsan.

L dutor de medejina generela Giuliano Piccoliori: "Chësc resultat nes dij mé che l 3,1% dl personal nseniant y nia nseniant dla scola à abù cuntat cun l SARS-CoV-2. Ne savon nia canche chësc cuntat ie unit a s’l dé, ma bonamënter bele dan 4-5 mënsc, y ne uel perchël assolutamënter nia dì che zachei de chisc posse ti taché l virus a d’autri o sibe n "purtadëur sann". Cunscidron che tla nrescida epidemiologica provinziela ne ova deguni n tampon positif, di 1.500 che ova fat pea, nsci che l fossa iusta stat tla nfezion. Oradechël ova tla nrescida Gherdëina, cun za. 2000 che ova fat pea, mé una na persona abù n tampon melsegur, che ne n’ie nia resultà positif dal tampon de cuntrol. Me aspiete n resultat analogh pra chëi nsenianc che ie resultei positifs de anticorps y nscila te na situazion putenziela de ti taché l virus a d’autri. Trat adum pòssen dì che l resultat va ite avisa tla dimescion dla nrescida provinziela che à mustrà su na sieroprevalënza dl 2,9%. La perzentuela de puech dessëura pra l personal dla scola pudëssa taché adum cun la destribuzion geografica de chiche à fat pea. Dé da lecurdé che on abù n valgun raions nsci dic hotspot, ulache la mesaria fova scialdi plu auta, mé per dì te Gherdëina cun 27% o Ciastel cun 17%. Nsenianc che vën da chisc raions possa sambën auzé la mesaria." Nscila Giuliano Piccoliori.
L test va inant mo duta l’ena.