La Usc di Ladins

Senteda dl Cunsëi de Chemun de Urtijëi. L pont plu aspità fova sambën la pruposta dl ambolt Tobia Moroder de co mëter adum la Jonta, l cuer y motor de n Chemun, ulache l vën n gran pert fat ora cieche l suzed tl luech y de ce viers che la dëssa ji inant ti cin’ ani che vën.

L ambolt Tobia Moroder à purtà dant a puntin duta la ancuntedes, duta la cherdedes sun telefonn y de coche n à fat cun i doi partic che ie reprejentei, ora dla Lista Unica, te Chemun, ruven ala fin che cunescion: do avëi »rot« cun l partner di ultimi cin’ ani, vëniel metù sun mëisa la pruposta de tò ite te Jonta l sëul cunselier dla Lega lità sun Chemun.

Lara Moroder à udù plu cosses defin autramënter. Sce l ambolt à sotrissà che ël ie pa chël che à venciù la veles, pona fova la ex vizeambolta de chëla che la SVP ie chël partit che à venciù y che ëila à davanià truepa ujes, ruvan defin daujin al resultat dl ambolt, che ova sambën l bonus de vester bele stat ambolt, ma à mpo perdù belau doicënt ujes. »Dessegur sciot che n ne se à nia capì,« dij Lara Moroder, che njonta che »la delujion ie granda, plucheauter che la LU ne à nia desmustrà na cërta umltà y critica persunela«, coche ëila ova fat dan 5 ani, »tulan su cun respet l resultat scialdi bon dla LU te si prima vela. La tëma dl ambolt che trëi assessëures per pert pudëssa fermé l Chemun ne vel nia,« dij Lara Moroder: »L ambolt messëssa se lecurdé de coche n à laurà ti ultimi ani y che duc uel l bën dl luech.« Lara Moroder fej nce a l savëi che l ambolt ne ëssa nia ulù n ex ambolt tla Jonta. Chël semiova nce vester, do si minonga, l majer problem.

L articul ntier cun truepa tëutes de posizion ie da liejer tla edizion stampeda di 23 de utober.

Simon Peter Moroder

FOTO: Coche da tradizion sënta la SVP a man drëta te sala de Chemun, ma per l prim iede al’oposizion.