La Usc di Ladins

Cin persones, dutes de Gherdëina y danter 28 y 34 ani, ie unides pluredes dai Carabinieri per puscion de sustanzes pruibides y per avëi viulà la normes anti-Covid-19.
I Carabinieri à sun mëisa te sala abinà cater grams de cocaina, vintedoi grams de marijuana, diesc grams de hashish, doi tablëtes de ecstasy y dodesc "boi" de lsd.
Pernanche la persones ova capì che l fova i Carabinieri, ài purvà a se ascuender, un te sauna. L patron dla utia se à trat ora desnut dedora y da dedò iel su sun tët dla utia, manacian l suizide. I Carabineri ie stai boni de l fermé.
Te na percuisizion di Carabinieri tla cëses dl'autra persones iel mo unì abinà leprò set grams de marijuana, n gram de hasish y scatules de medejines cun laite delorazepam, na sort de benzodiazepina. Śën vàla per l'autoriteies de abiné ora ciuna apoteca che ebe vendù chësta sustanzes zënza rezeta de n dutor.