La Usc di Ladins

Coche ch'la mutans dijova ntlëuta fova la scuadra si segonda familia, si cumpanies de scuadra fova sciche surans per ëila. Simona, nasciuda tl 1993, ova cun nuef ani scumencià à pratiché l sport dl saut cun i schi, ntlëuta canche Romed Moroder se ova cruzià de mëter su na scuadra de chësta disciplina sportiva nce te Gherdëina.
Drët adateda per l sport, se à Simona fat inant n puech al iede ruvan nchin te scuadra naziunela. A pèr cun l sport jìvela nce ala scola auta, plu avisa fòvela tla sezions sportiva dl ITE de Urtijëi.
La fova na jëuna da na gran positività, y for cuntënta.
L fova l scumenciamënt dl ann 2011 canche Simona fova furneda cun la scuadra naziunela taliana a Schonach tl Schwarzwald per na garejeda de saut cun i schi. Ma tan inant ne n'iela per Simona nia unida. Daduman te hotel iela unida stleta y nce sce ie mo stac boni de la reanimé, iela l dì do ai 7 de nuvëmber morta tla tlinica universitera de Freibung. De gauja dëssa vester stat n virus.
La vënta dla garejeda a Schonach ti ova la pluricampiunëssa Daniela Iraschko dl'Austria dedicà a Simona.
Ntant iel passà diesc ani da chësta ntraunida tragica, che à tucà dassënn duta la junanza de Gherdëina y nia mé.
Duman mierculdi ai 6 de jené, dala 9:30 saràl tla dlieja de S. Cristina na mëssa n si lecort.