La Usc di Ladins

La gravidanza, le sté de pert y i pröms agn de vita di mituns ó dí mudamënc y desfides por i geniturs bele te na situaziun normala. Ëres y pérs che aspeta n möt é te na situaziun ezezionala a livel emozional y implü vëgnel sëgn lapró la situaziun fora dl normal incër l’emergënza dl virus Covid-19. Le team competënt de Puster ó avisa te chësc tëmp ester n sostëgn por neo geniturs y sü mituns.

Normalmënter pó le pere dl viadú ester pro la uma canche ara stá de pert. Sëgn n’é chësc nia plü conzedü, odüda la situaziun d’emergënza. Tó tl brac le pope é proibí por motifs de segurëza. Al pó ester d’aiüt te chësta situaziun fora dl normal, sce chi che é tl deventé geniturs se arjigna ca, baian de sü sentimënc y de sües tëmes, lascian forsc ince lerch a delujiuns. Baian un cun l’ater, de crüzi y de döt ci che an sënt, pól gní ciafé poscibilités por fá frunt a chëstes situaziuns.
I dé le bëgngnü al viadú pón tres fotos y videos (lás, neni, mëdes, berbesc, amisc) y i geniturs jogn pó cunté de sües esperiënzes y partí sües ligrëzes mo magari ince cunté di momënc plü ri tres telefon o messaje vocal. Ligrëzes che an partësc devënta ligrëzes doples y soferënza partida devënta plü lisiera.
Sce chi che é tl deventé geniturs o families cun mituns da 0 a 3 agn á domandes o malsegurëzes, é nosc team competënt, che fej pert di sorvisc soziai dla comunité comprensoriala de Puster, dl’aziënda sanitara y dla consulënza familiara, a osta desposiziun, dantadöt te chësc tëmp critich. Le grup de laur, che é metü adöm da na pedagoga soziala, na psicologa y na assistënta sanitara, píta consulënza al telefon sides por ci che reverda domandes co ince ci che reverda malsegurëzes tl raport danter mituns y geniturs. Te situaziuns particolares vëgn le personal ince a ciasa sce al vá debojëgn. Por tó sö contat pon cherdé sö le numer de telefonn 333 6203945 o scrí na e–mail a fruehe.hilfen@bzgpust.it. I recordun che le sorvisc é debann.
Le Presidënt dla comunité comprensoriala de Puster Roland Griessmair rengrazia le team y sotrissëia che: "Le travert de döt le team é chël da renforzé y ti dé sostëgn a chi che devënta geniturs, mo ince ales families jones, döt chësc ince tl tëmp dl coronavirus. Insciö che ince i viadus che vëgn al monn te n momënt critich pëies impó ia bun tla vita. (Comunité Comprensoriala de Puster)